Herritar talde batek hurrengo urterako "gainontzeko euskal herritarren neurriko osasun zerbitzu publikoa eta Amarotz auzoarentzat botikina" eskatu ditu.

Tolosaldeko ATARIA

Tolosako udaletxearen aurrean elkartu da herritar talde bat, eta koplak abestu ondoren, gutuna irakurri dute Tolosako Udalari zuzenduta. "Aurten bereziki txintxoak izan gara eta desio batekin gatoz: gainontzeko eskualdeen neurriko osasun zerbitzua izatea, guk ere gure zergak pozik ordaindu ditzagun. Ea zuek ere datorren urtean etxeko lanak egiten dituzuen!", zehaztu dute gutunean. "Bestalde, elkartasun garaiak direla eta, auzokideen eskariei kasu egitea eskatu nahi dizuegu. Bada garaia Amarotzen botikina jartzeko!", gaineratu dute. Horren ondoren, gutuna eta ikatz zaku bat utzi dute udaletxearen harreran.

Ondoren, Asuncion klinikaraino joan dira, eta bertan ere koplak abestu dituzte eta ondoren gutuna irakurri. Langileei lore sorta bat eskaintzen dietela azaldu dute, "bereziki egoera hau pairatzen ari zareten guztiei", eta eskertu egin diete bere lana. Klinikako zuzendaritzarekin, aldiz, kexu agertu dira gutunean: "Ez duzue gure osasun zerbitzua behar bezala bermatzen, eta gainera, oldarkor jokatzen duzue benetan zaintzen gaituzten langileekin". Hurrengo urtera begira zuzendaritzari eskariak egin dizkiote: "Gure zergak pozik ordaindu ditzagun, merezi dugun kalitatezko osasun zerbitzuak bermatzea, eta langileekin jatorragoak izatea". Ondoren, Asuncion klinikako harreran, bertan zeuden langileei lore sorta eskaini diete, eta gutuna eta ikatza zuzendaritzari helarazteko eskatu.

Tolosako Udalari eskainitako koplak

Hator hator, udaletxera,

osasun-publikoa eskatzera,

gabon gaua ospatutzeko,

herritar guztien antzera,

ikusi nahi det, botikina ta

osasun zaintza duina

Eragion Olatz,

herriak nahi duenari

ospitala egin artean

ospitala egin artean

txipli txapla plun,

gure zergak pozik

ordaindu ditzagun.

 

Asuncion klinikari eskainitako koplak

Hator hator, Asuntzionera,

gazi-gozoak eskaintzera

Gabon gaua ospatutzeko,

langileekin batera,

Eskertzen dugu, euren jarduna,

ta-emandako tratu ona.

Nahikoa da Monti,

kideak mehatxatzeaz

ez dugu ta onartuko

ez dugu ta onartuko

txipli txapla plun,

gure zergak pozik

ordaindu ditzagun