Lehen mailako arretan diharduten profesionalen lan egoeraren larriaz Gipuzkoako Medikuen Elkargoak emandako abisuaren atzean dauden arrazoietan sakondu dute Garcia presidenteak eta Iriarte sendagileak.
Sare sozialek eman ohi duten oihartzunarekin, bizkor zabaldu zen lehengo astean Ina Idarreta familia medikuak —35 urteko lan esperientzia— egun lehen mailako arretan sendagileek dituzten lan baldintza zamatsuen inguruan idatzi zuen gutuna. Gipuzkoako Medikuen Elkargoak aukera baliatu zuen adierazteko kezka partekatua dela hori osasun sare publikoko profesionalen artean. Lan baldintza «gogorren» ondorioz, usu «estresatuta, haserre eta motibaziorik gabe» ari direla salatu zuen. Urrats hori egitera zerk bultzatu dituen azaldu du elkargoko presidente Manuel Garcia Bengoetxeak (Errenteria, Gipuzkoa, 1945) Jon Iriarte Aseginolaza familia medikuarekin (Donostia, 1980).