Asuncioneko zuzendaritzari negoziatzeko "borondatea" izatea eta Eusko Jaurlaritzari eta Tolosako Udalari "negoziazioan erantzukizuna hartzea eta ospitaleko publifikazio proiektuari lehentasuna ematea" eskatu diete.
Tolosako Asuncion klinika kudeatzen duen Inviza enpresako langileek hitzarmenaren negoziazioa "blokeatuta" dagoela salatzeko elkarretaratzea egin dute. Maiatzean hasi ziren zuzendaritzarekin bilerak egiten, eta salatu dutenez, "zuzendaritzak murrizketak besterik ez ditu proposatzen".
Ospitaleko langileek zerbitzu publikoa eskaintzen dutela gogoratu dute, "beste eskualde batzuetan Osakidetzak egiten duena", eta urteak daramatzatela "lan baldintza duinak" borrokatzen. Hala, lan jardunari begira, "administrazioko azpikontratazio askotan astean 35 ordu lan egiten dutenez", hori hartzen dute erreferentzi moduan hitzarmen berrirako, eta soldata igoerari dagokionez, KPIaren araberakoa izatea eskatzen dute, "onargaitza baita negoziazio honen ondoren, langileak lehen baino pobreagoak izatea".