2016-11-06

Bost urteotako bidea eta aurrera begirakoa aztertuko ditu TOPAk


Itzea Urkizu Arsuaga TOLOSALDEKO ATARIA

Hilabete honetan amaituko da Eusko Jaurlaritzako Osasun sailak eta Asuncion klinikak 2011n sinaturiko hitzarmena, eta TOPAk eredu aldaketaren aldarriari eutsiko dio.
2011n ekindako bideari eutsi nahi diote, hitzarmenari alternatibak eskainiz.

Hilabete honetan du epemuga, 2011. urtean Eusko Jaurlaritzako Osasun sailak eta Invizak sinaturiko hitzarmenak. Urte hartan bertan piztu zen, Tolosaldean, osasun sistemaren kudeaketa aldatzeko gizarte mugimendua eta, beren aldarrikapenen txanparik garrantzitsuena iritsi da. Horrela, Tolosaldea Osasun Publikoaren Alde (TOPA) koordinakundeak azarorako agenda plazaratu du agerraldi batean: «Oso une garrantzitsuan gaude, jokoan baitago guk eta gure familiek jaso behar dugun osasun arretaren eredua».

Urteotan guztiotan, hainbat izan dira koordinakundeak egindako txosten, mahai inguru eta mobilizazioak; ordezkari politikoekin ere bildu izan dira, eskualderako kudeaketa publikodun ospitale publikoa eskatzeko. Horrela, datozen egunetarako ere antzeko hitzorduak iragarri dituzte, helburu bakarrarekin: gaur egungo baldintzetan, hitzarmena berriro sinatu ez dezaten.

Datorren azaroaren 10ean ekingo diote hitzorduen zerrendari, Euskal Herria plazan. Invizak kudeatutako Asuncion klinikak osasunaren inguruko jardunaldia antolatu du Aurrera eginez, parekidetasunerantz izenburupean, eta TOPAren iritziz «kontraesan hutsa da jardunaldia, gainerako eskualdeetako ESIen aldean Tolosaldeak sekulako desberdintasunak dituela kontuan izanda». Horrenbestez, Topic zentroaren atarian, 08:30ean egingo duten elkarretaratzera deitu dituzte herritarrak.

Hilaren 12an, berriz, larunbatarekin, TOPAk informazio batzarra egingo du Tolosako kultur etxean, 12:00etan. Besteak beste, azken bost urteotan klinikaren eta Jaurlaritzaren arteko hitzarmenak eman duena baloratuko du koordinakundeak: «Agintari politikoekin izan ditugun harremanez ariko gara eta, era berean, Eusko Legebiltzarrean gaiak hartu duen tarteaz, TOPAren eta eskualdeko alkateen bitartez».

Asuncion klinikaren «hutsuneak» salatu eta hura publiko egiteko aldarrien balorazioarekin batera, TOPAk informazio berria ere eskainiko du azaroaren 12ko batzarrean: Tolosaldeko ESI zerbitzuko kudeatzailearekin izandako bilerak emandakoa azalduko dute.

Azkenik, hitzarmenari bestelako forma emateko aukerak proposatzeko baliatuko dute batzarra. TOPA koordinakundeak agerraldian azaldu duenez, «gurearen antzeko arazoei beste zenbait herrialdetan nola erantzun dieten» aztertuko dute, eta Herrialde Katalanetako eredua baliatuko dute, adibidez.

Bost urtean aldarriz aldarri egindako bidea bizikleta martxarekin biribilduko dute, azaroaren 26an: «Parte hartzera gonbidatu nahi ditugu herritarrak, pedalak mugituz osasun publikoa aldarrikatzeko».


TOPA-REN AGENDA 

Azaroaren 10a, osteguna
08:30. Elkarretaratzea egingo dute opic zentroaren atarian, Asuncion klinikak osasunari buruz egingo duen jardunaldi baten harira.

Azaroaren 12a, larunbata
12:00. Informazio batzarra egingo dute Tolosako kultur etxean, azken bost urteak baloratzeko.

Azaroaren 26a, larunbata
Bizikleta martxa, familian.

--------------

ALBISTEA BESTE KOMUNIKABIDEETAN

2 comentarios:

  1. «Oso une garrantzitsuan gaude, jokoan baitago guk eta gure familiek jaso behar dugun osasun arretaren eredua».
    Gure borrokan dago kakoa. Etxeetan gelditu ezkero lapurtuko digute gure familietako osasuna.
    Mobilizatu.

    ResponderEliminar
  2. «Oso une garrantzitsuan gaude, jokoan baitago guk eta gure familiek jaso behar dugun osasun arretaren eredua».
    La renovación del convenio no es impepinable . No hay mas que ver en las anteriores noticias del blog lo que están haciendo los catalanes y los valencianos.

    ResponderEliminar